Op ehrer Bug zo Xante
met allerhand Trabante,
do wonnten ens en Tant:
Et elsa vun Brabant.
It hat nit Va noch Moder
un nor ’nen kleinen Broder,
dän hätt‘ se gruslich ömgebraht;
dat wood ehr nohgesaht.
Dröm der Küning satz sich ung’r de Linde,
un der Herold reef en alle Winde
da geköpp et Elsa secher wööd,
wann keiner för ehr Unschold fechte köm,
we’t sich gehööt
Lang wollt er keine kumme:
„Jawoll, gebacke Prumme!“
Su reef der Telramund,
su geftig we hä kunnt. –
Et Els wor zo bedoore,
dat ärm Minsch wor am loore
noh einem vun der Ritterschaff,
der Rhing erop, erav.
Doh op eimol ef et Volk: „E Wunder!“
Dann et kom ’ne Schwan der Rhing erunder.
Vör em Naache, dän dä Vugel trook,
doh stund ’ne schöne stolze Kääl.
Der Telramund verschrook
Un we en Donnerwedder,
doh kom hä glich an’t Ledder
däm falsche Telramund. –
Dat wor däm Lump gesund.
Et Els wood freigesproche,
un en de nächste Woche
spazeete, prächtig opgekratz,
dann hä un it noh’m Platz!
Och, en Esse! We dat gingk erunder!
Hummer, Lachs, e Ferken in Burgunder,
dat dem Volk, dat hungrig Vivat reef,
et Wasser en der Muul
als we en Senk zesammeleef.
Dat eß no zo gelunge,
hä hatt sich uusbedunge,
dat it nit froge sollt,
en ehrer Ungedold,
noh im, noh singem Wappe,
un wat för Deer dren jappe,
söns wör et Ihglöck vör de Katz,
un glich wödt avgekratz!
Wören se no nitt nohm Bett gegange,
hätt it nit zo frogen angefange!
Doch om Kanapee de halve Naach,
do soßen se und sungen se,
wer hätt su jett gedaach
Un we se su do soße,
do kunnt sei’t doch nit lohße
un saht för ehre Mann:
„We heisch do eintlich dann?
Sag, Heisch do Köbes, Pitter?
Wat beß do för ’ne Ritter?
Häß do die Vatter och gekannt?
Wo litt dein Heimatland?“
Och do wood hä wieß als wie ’ne Givvel,
wödig fohr hä en de Wasserstivvel.
„Wer ich ben? Der Lohengrin ben ich,
mer han jet an de Föß, Madam,
versecheren ich üch!“
Un fleuten op ’nem Fleutche:
„Adjüs, adjüs, leev Bräutche!
Kick do, der Schwan! Der Schwan!
Do kütt’e ald eran;
Jitz liet sich nix mih maache!“
Dann sprung hä en der Naache
un winkte lang noch met der Hand
dem Elsa vun Brabant.
En et Sackdooch kresch bedröv dat Irmsche,
un it schwenkte met däm Sonneschirmche;
doch der Schwaneritter blees im jet,
do ging it widder op de Burg
un laht sich en et Bett.
Text: Alfred Beines und Jakob Dreesen (1843-1907)
Musik: Alfred Beines – Margaretenwalzer ()
in Kölsche Lieder , Köln , ca. 1930
dat kriesche un dat bütze dat dät jetz nix mi nütze
