Am Sonndag warn mer dribb de Bach
was hammer do gelacht,
so warn zwaa Eheleut beschleucht
unn hawe Krach gemacht.
Uff aamal duds en dumpfe Schlag
die Fraa lieht uff de Gass
unn alle Kinner singe laut
des mecht en Heidespass
Die Fraa Rauscher aus de Klappergass
die hat e Beul am Ei
ob’s vom Rauscher, ob’s vom Alde kimmt
des klärt die Bolizei
En Griene hot den Fall geseh
un kimmt im Laafschritt aa.
Der Ehemann ruft ganz erschreckt
ich hab er nix gedaa!
Mei Alt, die kennt kaa Maß un Ziel
die hot zuviel gebaaft,
drumm hot der liewe Herrgott
sie mit aaner Beul gestraft
Die Fraa Rauscher aus de Klappergass
die hat e Beul am Ei
ob’s vom Rauscher, ob’s vom Alde kimmt
des klärt die Bolizei
Jetzt gehts uffs Bolizeirevier
die Buwe hinerdrei.
Des is en intressanter Fall
des leucht doch jedem ei.
De Kommissar is ganz empeert
un segt, des is doch doll.
Der Griene, wie sich des geheert
der gibt zu Protokoll
Die Fraa Rauscher aus de Klappergass
die hat e Beul am Ei
ob’s vom Rauscher, ob’s vom Alde kimmt
des klärt die Bolizei
Jetzt wärs genug, die Rauschern hat
sich mit ihrm Mann versöhnt,
des kennt mer schon un is mer aach
in solche Fäll gewöhnt,
doch so en beeser Zeitungskerl
dut mehr als wie sei‘ Pflicht,
am annern Dag stehts dick un braat
im Bolizeibericht
Die Fraa Rauscher aus de Klappergass
die hat e Beul am Ei
ob’s vom Rauscher, ob’s vom Alde kimmt
des klärt die Bolizei
Text: Kurt Eugen Strouhs
Musik: Bert Häuser (d. i. Norbert Bruchhäuser)
