Des Morgens fröh em Sonnesching
Der Wullewu noch schlief
Uns ganze Klick kütt an der Rhing
Derheim dann keiner bliev
Stolz setzen all mer an der Senk
Kei Minsch e Wöhtche säht
Wann dä Kuletschhot dann nit blänk,
Mer schwenke met der Gäht
Mer fange Schnied´re, Hechte, Schleie
Hurra! Dä Chreß – dä hät ald Beß
Uns ganz Gelääch, dat deit sich freue
Wann bröllt dä Schääl: Ich han ‘nen Öhl
Am Thönche, an däm Schlaachtes eß,
För uns de schönste Plaatz,
Doh hätt der ganzen Dag mer Beß,
Wat sin de Fesch su staats!
Uns keiner doh jet maache kann,
Wer kütt weed uusgelaach
Me’m Wattler noch allein mer han
Dä ganze Rhing gepaach
Mer fange Schnied´re, Hechte, Schleie
Hurra! Dä Chreß – dä hät ald Beß
Uns ganz Gelääch, dat deit sich freue
Wann bröllt dä Schääl: Ich han nen Öhl
Metunger wann de Fesch sin geck,
Dann kritt mer off de Krautz,
Kei Rutaug noh däm Würmche leck,
Se halde zo de Schnauz.
Met Kies und Öllig weed gelock,
Op eimol bieß jet an
Un träcken alle Mann met op,
Dann hängk ne Schluffen dran
Mer fange Schnied´re, Hechte, Schleie
Hurra! Dä Chreß – dä hät ald Beß
Uns ganz Gelääch, dat deit sich freue
Wann bröllt dä Schääl: Ich han nen Öhl
Mer flutsche noh ‘nem wärme Rähn
Naaks en de Prumenad
Un söken doh met der Latähn
De Würm noh Feschers Aat.
Un alles kütt dann en de Dos,
Su’n Dheer gewennt sich flöck
Mänch ärme Wurm, dä obdachlos,
Bei uns noch mäht sie Glöck
Mer fange Schnied´re, Hechte, Schleie
Hurra! Dä Chreß – dä hät ald Beß
Uns ganz Gelääch, dat deit sich freue
Wann bröllt dä Schääl: Ich han nen Öhl
Uns ganz Gelääch, dat weiß Bescheid,
Wann kütt vum Rhing der Här,
Kei Minsch dann wigger feschen dheit!
“‘nen Dag, Herr Kommissär!”
Mer setze stell, em Mung de Nötz,
Dat eß däm garnit klor
Un han ‘nen duden Hungk am Stätz,
Dä grad versoffe wor.
Mer fange Schnied´re, Hechte, Schleie
Hurra! Dä Chreß – dä hät ald Beß
Uns ganz Gelääch, dat deit sich freue
Wann bröllt dä Schääl: Ich han nen Öhl
Text: Fritz Leisinger , 20. Januar 1895
Musik: auf die Melodie von Kaisermarsch Hipp Hipp Hurra
in Kölsche Lieder ( Köln , ca. 1930 )
